Penyerakup Politik Iban - Semina mimpi ?

1. Bansa kitai (Dayak), bisi 33 % ari semua rayat di diau di menua Sarawak. Kitai Dayak nguan semua bengkah menua ari Sematan ke Limbang di Sarawak lalu bisi mega ke ba Semenanjung din. Kitai Dayak diau di pasar-pasar besai lalu pia mega di entigis sungai.

2. Pemesai menua (geografi) magi bansa kitai lalu ngasuh kita bepechah enda baka bansa Cina ti maioh agi diau ba pasar.

3. Kati kitai tau ngasuh geografi, penatai aki ini menya, ai sungai siti-siti, pegai pengarap tauka politik kitai ngasuh kitai bebagi ?

4. Ba geografi, amat aku urang Sri Aman, tang aku tetap bansa Iban baka bala menyadi aku ari Julau. Pia mega amat aki-ini aku datai ari ulu Batang Rajang tang aku agi meh bansa Iban baka bala menyadi aku ti datai ari Skrang. Pia mega amat aku tu urang Kristian RC, menyadi aku ti SIB, SDA tauka ti agi megai pengarap lama aku agi bansa Iban baka sida.

5. Nama ti ngasuh bansa kitai balat bebagi deh? Politik? Amat ke enda?

6. Ba pengawa bepilih besai DUN tu tadi, enda tentu nyengala ga kitai bansa bebagi. Kebuah pia laban semua penuduk Dayak sigi diberi kitai ngagai bansa Dayak semina siti di Pelagus, enggi bansa kitai tang diberika bansa urang.

7. Nya alai, kati amat kitai Iban (Dayak) enda berakup? Jangka aku enda pia. Kitai sigi berakup ngelamatu. TANG.. Kitai berakup ngena cara ti meri undi ngagai pengari kitai Dayak ti enda meda/ngemata/nyaga bansa kitai.

8. Ari ni pun kitai bakanya? Laban kita nadai panggau agi alai kitai nunjukka penyerakup kitai baka maia agi bisi PBDS suba. Jangka aku PBDS sigi siti parti politik ti ulih nyerakupka bansa kitai.

9. Nya alai kitai patut berunding lebuh pengawa bepilih DUN ti deka datai. Kitai patut bisi panggau alai kitai mantaika penyerakup Iban.

10. Iban berakup enti ditesau tau ngiraukan maioh bengkah urang. Ingat kita, maia bepilih besai, radio Iban enda kala nyambut talipaun tang semina macha fax aja. Tu meh nunjukka kitai agi diketakutka urang. Tu meh pengering kitai enti kitai betesau lalu beserakup.

11. Kitai Iban patut bisi sumpah penyerakupka bansa kitai. Sumpah ti nanchang kitai ngambi kitai nemu ari ni penatai kitai, nama pangkat rama kitai, pengarap ti dipegai kitai, ai ti endur kitai diau, nuan, aku,enggau iya sigi IBAN ... urang asal menua tu empu.

Mupuk aku

Jentau Injin Langit, Apai Naga Melit, Peti Menani ti Memunyi Manah Dedinga, Pedang Jungkang Pengeremang Remang, Pemumpung Pala Raja, Bum Angin,Bum Muta, Mechanka Menua Ngerubuhka Nengeri.